தவம்

கிழித்து சென்றது
காற்று

எட்டி பார்க்க
எத்தனித்த என்னை
இழுத்து சென்றது
இயற்கை

மரத்தின்
தனிமையை மதித்து
விடுமுறை அளித்தன
இலைகள்


சுமைகள் நீங்கிய மகிழ்ச்சியில்
மௌனமாய்
விண்ணை நோக்கி
தவம் இயற்ற தலைப்பட்டது மரம்

எச்சம்

கையில் கிடைத்த
சொற்களை சேகரித்தேன்

வேண்டும் வேண்டாம்
என ஒதுக்கிய முடிவில்
நானும் நிகழ்வும்
மட்டும் கவிதையாய்

அரவணைப்பு

நடை பயணம்
நடுக்கத்தில் நான்

தன் கை
நீட்டியது மழை

அகம் குளிர
வீடு சேர்ந்தேன்

தவிர்த்தல்

கட்டாயத்தில்
காக்கும்
உரிமை
கைவசமானது

சொந்தமில்லா
பொருளுக்கு
விலை
பேசப்பட்டது

காக்க மட்டுமே
தெரிந்த என் அறியாமை
காண்போரின் கேள்விகளில்
வெளிப்பட்டது

சோதனை முடிவை
உரிமையாளனிடம்
அறிவிப்பதாய் சொன்னவரை
வீட்டிற்கு அழைத்தேன்

பிறிதொரு சமயம்
என்றார்
புன்னகைத்து
விடை தந்தேன்

பார்வையாளர்கள் வரவும்
புன்னகையுடனேயான
விடை பெறலும்
மீண்டும் தொடரலாம்

குறைந்த பட்சம்
வீட்டிற்குள் வரவேற்கும்
கட்டாயமேனும்
தவிர்க்கப்படலாம்

வேண்டுதல்

நேரில் பார்க்கவில்லை இறைவா - ஆயினும்
நேசம் குறையவில்லை உன்னிடம்
காசு பணம் வேண்டாம் - உடன் பேச
காகிதம் இது போதும்

எண்ணங்கள் அலைமோதும் போது - அதை
எழுதிடும் திறன் வேண்டும் - இன்பம்
என்றோ வரும் என்று
எதிர்பாரா நிலை வேண்டும்

இன்ப துன்பம் பகிர்ந்து கொள்ள
இனிய தமிழ் வேண்டும் - இறைவா
உன்னிடம் நான் பேச
கொஞ்ச நேரம் ஒதுக்க வேண்டும்